Tâi-gír

「權」--字，在來是讀做無送氣 ê「kuân」，kàu tann，誠濟老大人 iá是按呢呼音，咱看在來韻書 ê 記錄：

 【唐韻】【廣韻】巨員切【集韻】【韻會】【正韻】逵員切，𠀤音拳，中古音是全濁 ê〈羣〉母。

1800年《彙音妙悟》：kuân

1818年《彙集雅俗通十五音》：kuân

1832年《福建方言字典》kuân

1873年《廈英大辭典》：kuân

1913年《廈門音新字典》：kuân

1923年《增補廈英》：kuân

1931-32年《臺日大辭典》：干焦「職權」、「權利」只兩个詞 ê「權」是送氣、無送氣兩音計收，其他有「權」ê 詞彙計是收無送氣 ê「kuân」。

2004年《當代泉州音字彙》：kuân

中古濁聲類，泉州、漳北一般讀做無送氣 ê 字，漳南有 ê 確實是會讀做送氣。目今一般 ê 臺語人（掛臺語專家）pōo-pîn 干焦知影【權】讀做「khuân」。早期傳統韻書計收無送氣，現 tsú 時絕大多數 ê 臺語人計講送氣，造成遮爾大 ê 演變，欲講是漳南 ê 遺留（漳南有共【權】讀做送氣 ê「khuân」），嘛袂用得講無可能，總--是，若有，照講嘛是屬極少數。

送氣 ê「khuân」拍算是日本時代 tsiah tāu-tāu 出現 ê 新音。【權】--字，在來咱 ê 話日本時代中期進前 ê 韻書，計孤收無送氣，到日本時代中期 ê《臺日》tsiah 出現送氣 ê 記錄，uì《臺日》ê 記音來看，唯一兼收送氣 ê「職權」、「權利」兩个詞，計是借自日本話 ê 臺語外來詞，其他有「權」ê 詞彙計是孤收無送氣 ê「kuân」。

在我 ê 淺見，臺灣人後--來多數共「權」--字讀做送氣 ê「khuân」，應該是因為日本字音 ê 因端，有可能是受著日本話「權(けん)」送氣音 ê 影響，kap「哲(てつ)」讀做「thiat」ê 情形 sâng 理路。