「apple(蘋果)」ê臺語兼論臺北話【官果 kuann-kó】－Tâi-gír

　　英語號做「apple」ê 種个(tsióng-ge)果子，臺語除了khah聽會著ê【蘋果 phông-kó】、【林檎 lìn-gòo/gò/gooh】以外，臺北、三峽有講做【kua-kó】，《增補廈英》（1923）有收「kua-kó」，毋拄伊ê解說(kué-serh)是「pumpkins」，臺北人說做【kuann/kua-kó】，杜建坊先生主張是【官果 kuann-kó】；金門另外有講做【phîng-kó [phiŋ kɔ˥˩]】；賴仁聲牧師1960年出版ê《可愛的仇人》，有寫做【pîn-kó】（p.47）。教育部《臺灣閩南語常用詞辭典》本底是共頭--字記做陽去ê【phōng-kó】，2018年六--月改做陽平ê【phông-kó】。

　　1873年《廈英大辭典》kap 1883年《英廈辭典》計是收「pîng-kó」，漢字計寫做「平果」，【平果 pîng-kó】有可能是漳泉廈ê原型。kàu 1923年佇臺北出版ê《增補廈英》，有關「apple」ê詞彙計共四个：「pîng-kó」、「pîn-kó」、「phōng-kó」、「phiāng-kó」。1931、32年ê《臺日大辭典》收三个詞彙：【平果 pông-kó】、【平果 pîng-kó】、【林檎 lîm-khîm】，當然，「林檎」ê語根是借自日本話「林檎(りんご)」ê臺語外來詞，一般是綴日本話ê呼音讀做【lìn-gòo/gò/gooh】，毋拄嘛有用臺語音來讀日本話ê漢字【林檎 lîm-khîm】，我pat聽臺灣人講--過。閩南嘛有講【林檎 lîm-khîm】，可比講廈門海滄溫福來、漳南銅山何煒，毋拄亻因是指「釋迦」，銅山部份變做「lêng-khîm」，潮汕有的是讀「nîm-khîm」。

　　臺北人所講ê【kuann/kua-kó】，漢字應當就是「官果」，路尾部份臺北人鼻化脫落變做【kua-kó】。因為共「apple」講做【kuann/kua-kó】，毋但咱ê話在來ê辭典計無收，福建漳泉廈、臺灣中南部嘛計無種个說法，權算是以臺北為中心ê「臺北話」，拍算是日本時代tsiah新生ê新詞，究勘伊ê語根，咱聽好參考【官燕 kuann-iàn】kap【官桂 kuann-kuì】tsit兩个在來ê詞彙，《廈英》kap《臺日》ê解說是「birds'-nest of fine quality. 上等の燕巢。官燕。」、「best cinnamon. 上等の肉桂。」在我土想，因為「apple」並毋是臺灣土產ê果子，定著是愛進口，毋但價數真懸，往過一般ê人家也罕得食會得著，臺北人應當就是用在來「官桂」、「官燕」ê舊構詞法來起造只ê新詞【官果】，共【官果】解說做「上等の果物（日文）」，意思準做是「貴參參ê果子」。蔡文榮前輩另外補充【官參 kuann-serm/sim/som/song/sam】、【官庄 kuann-tsng】只兩个詞，來鬥贊聲。

　　我記錄對岸一寡好朋--ê提供ê語料，DP孫--先：廈門島內是「phîng/phiâng-kó」；林建輝：漳北、廈門講【phîng-kó】，同安有講【phîang-kó】，漳浦講【phîong-kó】；鯉城徐楓：【phîang-kóo】；晉江阿郎：【phîang-kóo】（老派），【phîng-kóo】（新派）；何煒講亻因銅山是講【pîn-kó】；詔安秀博：【pîng-kó】；林博義講亻因崇武是講【phên-kó】；安溪飼豬講【pîng-kér】；安溪宏偉【phîng-kér】：安溪沙嗲麵：【phîng/pîng-kó】；永春Ng Using講【pîn-kér】；蒼南阿森：【pîng-kóo】。

　　算算--咧！若先莫論陽平參陽去ê異同、次方言音韻系統lǎi ê音變（ex./-in/ → /-en/(崇武)、/-ing/ → /-iong/(漳浦)）、語流音變（ex.鼻化脫落、外來借詞陰去kap喉束陰入ê爭差），咱ê話ê「apple」有下底三種語源：

1.【平果】：根據 wikipedia，上早出現「蘋果」ê文獻是明萬曆ê《群芳譜‧果譜》，語源來自梵語bimbara，bimba是古印度佛經所講ê一種果子，上早號做「頻婆」，lōo尾漢語有寫做「平波」、「蘋婆」。所致【平果】論真也是外來借詞，頭--字ê語根有可能是借自梵語 ê音譯詞，致使漳泉廈各地頭--字 ê 呼音誠各樣，上少有下跤只幾種呼音：「pîng/pîn/phîng/phîn(phên)/phiâng/phîong」，有个呼送氣、有个呼無送氣，有个呼前鼻音、有个呼後鼻音，有个/-iəŋ/主要元音低化變做/-iaŋ/，臺語現 tsú 時上主流ê【phông-kó】，權算是上新 ê 變體，也會用得講是正港 ê 臺灣話。次字【果】是在來--ê，「kó/kóo」是文讀棧，「kóo」是三邑泉腔ê文讀，「kué/ké/kér」是白讀棧。

2.【林檎】：臺語【林檎】ê語根是來自日本話，日本話「林檎(りんご)」ê語源是來自中國古漢語，現代臺語一般講做【lìn-gòo/gò/gooh】，權算是音譯日文和漢詞，若讀做【lîm-khîm】--者，是借形詞，用臺語ê漢字音讀讀日本話ê漢字。