MacaoPão－Tâi-gír

MacaoPão

相片1

　　只間店開佇臺北市ê永康街，華語名號做『澳與葡豬扒包』，華語名無siánn-mih聽好(thìng-hó)碓重(tuì-tiōng)--ê，值得咱來注目(tsù-ba̍k)--ê 是佇只塊看板(kha̋ng-páng)－「MacaoPão」（相片1）。

　　「Macao」是【澳門 Ò-mn̂g】ê英語，毋拄若是佇澳門當地，一般會拼做葡萄牙語ê「Macau」（可比講下底相片2、3），究勘(kiù-khàm)伊 ê 語根，應當是因為當地有一間閩南討海人起ê媽祖宮－「媽祖閣」（相片4），宮廟邊--頭ê港口號做「媽口」，葡萄牙人寢頭(tshím-thâu)來夠塊(tèr)ê時，問在地人講tserâ是佗落？在地人用閩南話共亻因應講：【媽口 má-kháu】，所致葡萄牙人就共號名做「Macau」(1)。1873 年ê《廈英大辭典》就有記載「má-káu, Macao. má-káu-lâng, a Portuguese. má-káu-chûn, a Portuguese lorcha.」日本時代ê《臺日大辭典》也有收錄【媽口】(2)、【媽口船】、【媽口薰】、【媽口人】ê 詞彙，毋拄咱著斟酌伊 ê 聲母，無論《廈英》抑是《臺日》ê原文版，「má-káu」ê「káu」計是讀做無送氣ê「káu」，（《臺日》ê 網路版誤植做送氣ê「kháu」），馬來西亞ê福建人，kàu tann iá 是共廣府人叫做【媽口人 Má-káu-lâng】，海澄 ê 新垵人有人共廣府話號做【媽口話 Má-káu-uē】，嘛有用佇講話歹聽、歹聲嗽 ê 時，會講【講 siánn-mih 媽口話】。『留聲機』古早號做【媽口琴 Má-káu-khîm】，『鍍錫鐵』古早號做【媽口鐵 Má-káu-thih】；毋拄，晉江是說送氣 ê「má-kháu」。

　　葡萄牙人讀輔音ê時，只有voiced（帶音 / 濁音）kap voiceless（不帶音 / 清音）ê 分別，並無「送氣(aspirated)」參「無送氣(unaspirated)」ê 分別，原則上亻因是讀「無送氣」--ê，所致《廈英》kap《臺日》tsiah 會共音標注做「má-káu」(3)。另外根據好朋--ê 張慕天兄（லாஙித் கிரிந்புத்திரா）ê 看法，因為葡萄牙語只種無送氣音ê音韻結構，所致「má-káu」是葡萄牙語共閩南語ê【媽口 Má-kháu】借入去變做「Macau」了後，閩南語則閣反倒轉 uì 葡萄牙語ê「Macau」借入來變做「má-káu」，也就是出口了後 tsiah閣進口。

　　「pão」是葡萄牙語ê「bread」，日本人路尾借葡萄牙語ê「pão」，變做日本話ê「パン」，日本話ê漢字綴中文寫做「麵包」，臺灣人閣uì日本話共「パン」借入來臺語，變做是借自日本話ê臺語外來詞「pháng」，「pháng」ê語源毋是漢語(Chinese)，若硬欲共伊寫做漢字，只有「借字」、「造字」無別途，《教典》佇2018年新增詞條ê時，已經共「pháng」ê漢字訂做「麭」，是借「麭」--字「麥」字爿偏旁ê部首參「麵包」ê「包」字義，毋拄《教典》煞袂記得共「麭」註「替」--字來表示伊是「替代字」；臺灣做pháng誠出名个大色師傅吳寶春，有創一字[麥方]（相片5），論真，若掠「麭」kap[麥方]只兩字來比較，有臺語音思考ê[麥方]猶並(pīng)「麭」khah飭(thik)；總--是，臺語文ê規範敢干焦愛限定佇「漢字箍仔」來做「漢字奴」，在我土想，寫做羅馬字「pháng」上四是，也拄好會用得反映出伊是「借詞(loan word)」ê語言特徵。

　　臺灣人共「toast」講做「sio̍k-pháng」，我無學日本話進前毋pat，範坯(pān-pher)因為『白吐司』佇「pháng店」內底是上俗(sio̍k)--ê，所致號做「俗pháng」。lōo尾學日本話了後tsiah知影，日本人就是共「toast」講做「食パン」，臺灣人規組共人借--入來，「食」ê日本話讀做「しょく」，「く」借入來臺語自然變做「-k」收尾ê入聲字「sio̍k」，所致tsiah讀做「sio̍k-pháng」，參價數(kè-siàu)俗抑是貴，完全無底代(tī-tāi)。

　　目今ê臺灣人計是共「bread」講做「pháng」，部份少年家佇大賣場有講「麵包」，可比講阮鹿港大興隆攏按呢咧放送：「拄出爐ê麵包(mī-pau)……」，我拍算攑mài-khuh(mic)ê人是綴華語『麵包』來直譯--ê，並毋知影一百外年前ê《廈英大辭典》就有收錄「mīⁿ/bīn-pau, bread.」；臺語ê「bread」猶閣有一个名號做「麵磅(mī-pōng)」，日本時代ê《臺日大辭典》就有收錄，有一過，一位大稻埕(tāu-tiânn)ê老師共我講，亻因塊計是講【麵磅 mī-pōng】，結果煞去予南部出身ê同事、同窗--ê講伊講賺(tānn)，害伊毋知欲按怎，我反《臺日》予伊看，共伊講伊無講賺，是講伊講賺ê人kāi-kī毋pat！