今年度高中組朗讀文稿第四篇第二段：
阿母上𠢕煮洘頭糜......。會記得我讀國中的時陣，五點外就愛出門，四點外，灶跤就光焱焱，嘛有敲卵炒菜的聲。阿母攏會煮一坩燒滾滾的糜，先𣁳一碗公囥佇邊仔予冷，通予我先食，閣有伊攢的物配，予我有飽足的元氣，會當對透早上課擋到下晝。
只一段上尾許兩字，作者原文是寫「下晝」，大會第一次修正改做「中晝」，理由是「配合該組學生生活經驗」，論真，是因為《教典》的「下晝」孤一个釋義：「下午」。若阮「下晝」的用法，佮只篇文章作者的用法 sann-sâng，是「中午」。
窮實，「下晝」只个詞彙，有人是指「下午」，也有人是指「中午」。而且前字讀中調、低調--者計有，我上課的時，定定會調查只个詞的詞義以及前字的聲調（應該袂少人有印象），權算會有下底四種結果，我的經驗是指「中午」--的並指「下午」--的較濟。
1. 前字中調，指「中午」。
2. 前字低調，指「中午」。
3. 前字中調，指「下午」。
4. 前字低調，指「下午」。
下底舖排一寡往過的文獻：
指「中午」的記載：
小川尚義，《臺日大辭典‧上冊》，p.124。
蔡培火，《國語閩南語對照常用辭典》，p.53。
陳修，《臺灣話大辭典》，p.481。
董忠司，《臺灣閩南語辭典》，p.316。
周長楫，《閩南方言大詞典》，p.183。
陳正統，《閩南話漳腔辭典》，p.205。
指「下午」的記載：
杜嘉德，《廈英大辭典》，p.480。
盧廣誠，《實用臺語詞典》，p.46
黃晉波，《當代泉州音字彙》，p.1。
教育部，《臺灣閩南語常用詞辭典》，如附圖。
我會記得 Sio 老師捌講過一个實例，有一對翁仔某，早起亻因翁婿共亻因牽手講某乜人「下晝」欲來，叫亻因某「下晝」愛小攢--一下，結果「下晝」伊一下轉到厝，看見桌頂空空，就共亻因某嚷講：「我共你講下晝愛小攢--一下，你哪會攏無顫無悶！」亻因某嘛對喙就共亻因翁婿歹--轉--去：「啊下晝都猶未到--咧！你是咧大聲啥物！」
因為亻因翁的「下晝」是「中午」，亻因某的「下晝」是「下午」。
留言列表
