Tâi-gír

　　門窗上方施以圓拱狀(arch)的設計，此設計稱為【圓拱 uân-kong】、【圓拱仔 uân-kong-á】、【圓拱門頭 uân-kong-mn̂g-thâu】、【圓拱楣 uân-kong-bâi】，若是『拱橋』便稱作【圓拱橋 uân-kong-kiô】。《廈英大辭典》和《臺日大辭典》除了收「uân-kong」以外，另有收「uân-kiong」。

　　只个詞頭--字是陰平，毋是陽平。

泉州腔、老同安腔無人說做頭--字陽平 ê「khing_11/21/22 hun」，泉州腔、老同安腔一律說做頭--字陰平 ê「khing-hun」，《增補廈英》p.75、《臺日‧上》p.305 就是孤收「khing-hun」，無收「khîng-hun」，偏漳腔 ê 人陰陽平變調無分，所致《教典》誤做【窮分 khîng-hun】。另外一个同義詞【khin/khun/khirn-hun】，頭--字也是陰平。建議照《臺日》ê 音字【傾分 khing-hun】。

　　只个詞，陰陽平變調有分 ê 泉系方言無人說做「tsiann_11/21/22 si̍t」，一律說做「tsiann-si̍t」（鹿港、臺北、平溪、新竹、麥寮、金門、泉州、晉江、安溪、同安……），《臺日》、在來 ê 歌仔簿（冊）寫做「正實」，也會雙聲同化做「siann-si̍t」，安溪泉腔有說「sann-si̍t」，可能是「siann」介音脫落，在來 ê 歌仔簿（冊）寫做「相實」、「三實」，三邑泉腔另外有說做「sian-si̍t」，不管佗一个方音差，頭--字計是陰平字，毋是陽平字，《臺日》也是記做「tsiann-si̍t」，共頭--字寫做「誠」--字、記做「tsiânn」，是偏漳腔 ê 人陰、陽平變調無才調分 ê 誤解。「tsiann-si̍t」ê 本字，洪惟仁教授主張是「精實」，蕭藤村老師嘛頓「精實」一票，取「精確真實」ê 意思，漳南銅山 ê 何煒先生也贊成。

　　2014年《教典》ê 字音修訂會議，我就有建議：

　　6.「誠實(tsiânn-si̍t)」→「正實(tsiann-si̍t)」

　　總--是，咱人微言輕，會議最後並無採納小弟 ê 建議。

------------- 

　　「詳細」是一个文讀詞彙，泉腔个「細」--字文讀亦是西韻个「sè」，只个詞孤有泉音「siông-sè」、漳音「siâng-sè」，無「siông-suè」个音讀，《廈英》、《臺日》也是安爾記載，「細」--字佇「詳細」只个文讀詞彙並無白讀「siông/siâng-sè/suè/serè」个漳泉韻母對應，所致次字無分漳泉孤有一个文讀音「sè」。

　　『找工作(found a job)』，《教典》共漢字寫做「引頭路」（異用字「允頭路」），音讀孤收「ín-thâu-lōo」一音。

　　問題是，「ín/ún/írn頭路」个動詞有方音差，漳音「ín頭路」、新泉音「ún頭路」、老泉音「írn頭路」，「引」--字卻是無分漳泉孤有一音「ín」，無適合做「ín/ún/írn頭路」个「ín/ún/írn」，建議照《臺日》个音字「允(ín/ún/írn)頭路」。