Tâi-gír

答黃--先「童謠正月正裡面，十月十，冬瓜糖霜落『餅』盒，也有人寫『錢』盒， youtube 一位平和國小的同學表演，聽起來像『tseh』盒，請問『』裡面的正字是哪一個？又有人說荐盒，兩字相通？ 薦盒是神明桌上擺祭水酒的小貢桌，可以擺冬瓜糖霜嗎？在十月是什麼禮俗？」

【薦盒  tsiàn-a̍p】，「荐」--字通「薦」。

往擺个「薦盒」是用柴刻--个，或--者是用錫拍--个，裡(lǎi)底會做得囥糕仔、糖仔，所致《臺日》就是安爾解說--个：「落雁に似た菓子などを入れて神前に供へる區劃のある箱。」《廈英》个解說也真清楚：「chiàn-a̍p, a small wicker basket or paper parcel of a few sweetmeats offered to idols.」現主時个「薦盒」多數干焦佇懸頂囥三塊甌仔，佇祭拜个時用來斟三巡酒，抑是下(hě)茶米做清茶。

「十月十」是指「十月十五」个「下元」，是三界公之一下元大帝个神明生；咱民間除了每年正月初九个天公生以外，也會佇上元kap下元拜天公，共上元大帝kap下元大帝也當做是天公，阮鹿港到今(tann)夭有只个例；咱拜天公个時愛分頂、下桌，「薦盒」愛tshāi佇下桌天公燈座香爐个頭前（下底許(hí)張是阮塊拜天公个案桌），所致說「十月十，冬瓜糖霜落薦盒。」另外有个版本是說「十月十，三界公來【鑒納  kàm-la̍p】。」「鑒納」个意思是請神佛來接受祭品。