Tâi-gír

昨日(tsā-ji̍t)阮三叔做忌，是「生日忌」，在來咱 ê 話有說做【愍忌  bián-kī】，若是過身  hí 日 ê 忌日，是號做「死忌」；毋拄我問阮叔公仔、嬸婆仔、阮老爸，亻因計袂曉得「愍忌」，總--是，佇阮塊uì 開臺袓開始記 ê    hí 塊「忌神牌」，頂頭就有寫着「愍忌」，可見往擺也是有咧說「愍忌」。

照講，「忌神」是「忌辰」，毋拄阮   hí 塊kú是寫做「忌神」，拍算是往擺祖先誤植所致。

阮塊(gún tèr)做生日忌，毋是「三年新墳做三遍」，是逐年做。除了規年迵天年節時仔（年兜、上元、清明、七月半、九月重陽、冬節）大節(tuā-tsueh)拜公媽以外，阮塊做忌猶包括生日忌kap死忌，所致現tsú時一年愛做 ê 忌辰是：ta-poo 阿祖生日忌/死忌、tsa-bóo 阿袓生日忌/死忌、俺公生日忌/死忌、阿媽生日忌/死忌、三叔生日忌/死忌，計共 10 遍。

ps.「上元、清明、中元、冬節」是四大節。

在我土想，咱在來 ê 傳統應當是生日忌（愍忌）kap 死忌計有咧做，我會按呢講是因為，以阮公族仔為例，逐口灶做忌 ê 忌辰也計無 sann-sâng，(1)有 ê 像阮塊按呢誠頂真咧拜；(2)有 ê 干焦拜到上晏轉去 ê hí 勻；(3)有 ê 也是干焦做死忌，無做生日忌；(4)有 ê 嘛無做忌--囉！干焦改佇九月重陽 ê 時做陣拜。以上四種計是 sân g一位祖公派下，若有欲改 ê 人，著愛共祖公、祖媽跋桮，有允桮  tsiah 會得通改。

1873年 ê《廈英大辭典》、1913年 ê《廈門音新字典》、1931-32年 ê《臺日大辭典》計有收【愍忌  bián-kī】，可見【做生日忌】是咱在來  ê 傳統，總--是，唐山過臺灣了後，一代湠過一代，到目今若閣像阮塊安爾拜，是真厚草頭，所致多數  ê 人老早就已經改改--起來--囉！

福建到今猶有咧說「愍忌」， 毋知恁逐个厝--nńg 敢猶有咧說「愍忌」？