『巨蛋』ê 臺語愛障仔說？－Tâi-gír

　　捷運局講：「請教相關語言專家學者，由於『巨蛋』一詞，是源於外來的專有名詞，並不適宜以字面上的文字直譯，決議將『臺北小巨蛋』臺、客語比照國語發音播報，兩者皆唸成『臺北小ㄐㄩˋㄉㄢˋ』。」我無 siánn 相信言語專家會建議臺語、客話計讀做「ㄒㄧㄠˇ ㄐㄩˋ ㄉㄢˋ」，抑若無，就是提供建議 ê 言語專家學者毋是真正 ê 專家。

　　在來 ê 臺語專家早就提出真濟建議，大約仔會用得分做三派，一派是借華語 ê 漢字讀【巨蛋 kī/kū/kīr/kǐr-tàn/tān】；一派是借日本話 ê「ドーム(dome)」讀做「tòo-mù/muh」；另外一派是臺語人 kāi-kī 來造詞，杜建坊先生提供一个誠有臺語氣口 ê「圓拱埕」、「圓拱館」，http://blog.xuite.net/getting.rich/hopefully/48672837，可惜現 tsú 時，拍算已經誠濟臺語人毋知影 siánn-mih 號做【圓拱 uân-kong】--囉！連教育部 ê《臺灣閩南語常用詞辭典》嘛解說賺(tānn)--去。（補：我有寫一篇文探討〈【圓拱 uân-kong/kiong】〉）

1.【巨蛋 kī/kū/kīr/kǐr-tàn/tān】

　　「巨」--字有方音差，漳州音「kī」、廈門音「kū」、泉州音「kǐr/kīr」，只幾个方音差，佇臺北計有人說，現 tsú 時臺灣普通腔多數是說「kī」，有人建議臺北 ê 小巨蛋讀「kūī」，高雄 ê 巨蛋讀「kī」，更加會用得反映出南北無 sann-sâng ê腔口；「皮蛋」佇1923年 ê《增補廈英》、1931-32年 ê《臺日》計是記做「phî-tàn」，當然《增補廈英》亦有收「phî-tān」，「蛋」--字佇韻書是讀陽去 ê「tān」，「皮蛋」讀做「phî-tàn」，在我 ê 淺見，拍算是「官話借詞」。

2.「tòo-mù/muh」

　　這是借日本話 ê「ドーム」，日本話 ê「ドーム」是借自英語「dome」ê 外來語，可比講東京巨蛋正式 ê 英文名是「Tokyo Dome」。

3.【圓拱埕 uân-kong-tiânn】、【圓拱館 uân-kong-kuán】

　　【圓拱 uân-kong】窮實是在來咱 ê 話，也就是華語咧講 ê『拱形』，可比講「圓拱門」懸頂就是做一个「圓拱仔」，論真，咱在來並無圓厝頂 ê 建築，建坊先號做「圓拱埕」、圓拱館」，是取「圓拱(門)」加「(運動)埕」來號--ê。

4.提供一个 native speaker ê 臺灣人號 ê名，臺北 ê 只粒『大巨蛋』，阮老 pě 說【鵝卵 giâ-lěrng】。

總--是，臺語、客話計讀做「ㄒㄧㄠˇ ㄐㄩˋ ㄉㄢˋ」是上 kě 路--ê！

昨日(tsā-ji̍t)我去宜蘭做評審，欲轉--來 ê 時因為拆無車幫，所致去坐「葛瑪蘭客運」，結果車頭 ê 臺語放送，獨獨「葛瑪蘭」只三字毋是講臺語，煞干焦會曉用國語來講「葛瑪蘭」，論真，人宜蘭人本來就有用臺語咧講「噶瑪蘭」，教育部記做【噶瑪蘭 Kat-má-lán】，日本時代 ê《臺日大辭典》記做【蛤仔蘭 kap-tsú-lân】，只六音除了「lán」以外，攏是照漢字落去讀，這並毋是宜蘭人在地 ê 講法；我捌調查過一寡宜蘭人 ê 講法，有「ka-bá-lán」、「ka-má-lán」、「ka-bá-lân」。