【碼子 bé-tsí】－Tâi-gír

碼子1.jpg

【相片一】彰化市天公壇（元清觀）ê捐金碑記。

　　「〡〢〣〤〥〦〧〨〩」只種數字，咱ê話號做【碼子 bé-tsí】、【碼仔 bé-á】、【小碼 sió-bé】、【細本碼子 sè/suè/serè-pún-bé-tsí】，因為起源佇中國ê蘇州，所致一般ê華語是號做「蘇州碼」。

　　tse是一種傳統記數ê方法，臺灣較早（尤其是日本時代以前）若有咧做生理ê家族，佇亻因ê數簿內底攏看會著，佇現tsú時一寡古蹟ê碑文，咱也看會著用碼子刻斯當時寄付或--者是開銷ê錢額，可比講彰化ê天公壇（元清觀）、干豆ê關渡宮；2007年我捌去新加坡做調查，現tsú時新加坡ê唐人，佇亻因會館（廟寺）ê數簿，iu原有「拍碼子」咧記數。

　　因為「一、二、三」攏是徛劃ê「〡、〢、〣」，為著欲phiah免只三碼相連ê時會hut做伙，所致用橫劃「一、二、三」kap徛劃「〡、〢、〣」相隔開，有「一、二、三」只三个數字ê第一个數字用徛劃，第二个用橫劃，第三个用徛劃，以此類推。可比講「21」愛拍做「〢一」，以免拍做「〢〡」煞kap「〣(3)」hut重耽--去，「4,312」愛拍做「〤〣一〢」，以免拍做「〤〣〡〢」hut做「〤〣〣」--去。

　　「拍碼子」ê時，頂逝是記數值，下逝是記量級kap計量單位，一般ê數量級干焦拍上大位ê數量級，較細位ê數量級毋免拍--出來。可比講【相片二】是「60箍」；【相片三】下面計共平「69兩284」；【相片四】由右至左分別是「824箍」、「324箍7」、「41箍」、「51箍1」、「35箍2」；【相片五】由右至左分別是「7兩」、「6兩14」、「7兩12」、「5兩6」。

　　蕭平治老師講亻因老爸是講做「臺灣碼」，毋拄種个(tsióng-ge)符號並毋是干焦限定佇臺灣tsiah有咧使用，中國南北、香港、澳門、南洋計有咧使用。有一遍，阮老爸咧說日本話ê假名，伊說做【碼仔字 bé-á-jī】；本文咧討論ê主題，伊說做【碼子字 bé-tsí-jī】。阮二叔講伊國校五年ê數學，課本iá有咧教「碼子」，阮老爸娶某ê時，阮俺公開ê菜單嘛是計寫「碼子」。

　　「壹貳參……」只種大寫ê數字，咱號做【大本字 tuā-pún-jī】、【大本碼 tuā-pún-bé】、【大本碼子 tuā-pún-bé-tsí】；「一二三……」只種小寫ê數字，號做【小本字 sió-pún-jī】、【細本字 sè/suè/serè-pún-jī】、【小本碼子 sió-pún-bé-tsí】；佇《廈英》有記「toā-pún, large capital;」，《增補廈英》有記「toā-pún (+ S.) jī, capital letters. sió-pún-jī, small letters. toā-pún (+ S.), large capital.」，可見在來咱ê話，大寫就號做【大本（字）】，小寫就號做【小本（字）】，嘛用佇羅馬字ê大小寫。另外，「123……」只種Arabic numerals，咱號做【紅毛碼 âng-mn̂g-bé】、【番仔碼子】、【碼子字】。