恭喜洪惟仁教授獲頒教育部103年本土語言傑出貢獻獎－Tâi-gír

我毋捌受過任何語言學个專業訓練，本科是『嘉義吃飯學院睡覺系』，出業了後去讀臺北藝術大學傳統藝術研究所文化資產組，毋拄一直有咧關注臺語个聲韻、方音差、在來端的(tuan-tiah)个詞彙......，論真，我臺語个知識來源，絕大多數是來自自修，一方面是佇人文薈萃个鹿港近漢文先生讀漢文，包括施文炳先生、許漢卿先生、王景瑞先生、郭忠雄先生.....等鹿港个耆宿，猶閣有厝--nn̄g个視大人，除此以外，對我影響上大个學者，就是洪惟仁教授--囉！

參洪教授第一遍見面，應該是2001年伊𤆬元智个學生來鹿港做調查，斯當時，伊已經咧觀察鹿港人老、中、青三代人个語音變化；路尾我佇彰化中山國校做教員个時，洪--先有一改來鹿港高中做專題演講，演講煞，我送伊離開鹿港，伊轉去到臺中了後，用手機仔kap我講差不多有40分鐘个電話，伊全程用伊所理解个鹿港話參我開講，拍算伊嘛咧試驗我對鹿港話了解个程度，我共伊講我看過伊省乜書，隨去書架仔共書名一卷一卷報予伊知，相信伊應當是真歡喜，到今我猶會記得伊講，出名个語言學者，真濟計毋是講主流語言个人，因為kāi-kī个呼音參人無sâng，所致耳孔會較利，伊用只句話來共我勉勵。

2008年我離開彰化，起來到臺北，某一日卜開車轉去枋橋个時，又閣接着洪--先个電話，我掣一趒，伊說伊想卜邀請我來鬥整理伊个某一項計畫，鹿港篇个部分愛我來處理，我心內是真歡喜先生按呢看我有目地，毋拄毋捌受過任何語言學學術訓練个我，心肝頭實在也是真驚惶，到今，雖然一直有咧整理資料，總--是，因為無一个較完整个成果，煞害我路尾tsia̋n毋敢去揣--伊。

拄則看着即條新聞，感覺先生受着政府个表揚，是「實至名歸」，恭喜先生受表揚。同時嘛愛恭喜對我一直真照顧个施炳華教授，kap現主時當咧近伊學月琴唸歌个楊秀卿大師。