Tâi-gír

臺北俗語：「咸豐三，講到今。Hâm-hong sann, kóng kàu tann.」

即張海報共「now; at present」个「tann」寫做借音字「擔」，是借「擔」个音讀「tann」，目今教育部用「今」--字，嘛毋是本字，權算是「訓用字」，借「今」个漢字義。

咸豐三年(1853)，艋舺(báng-kah)發生「頂下郊拼」，嘛叫做「四縣反」，「頂」是指「三邑(sam-ip)人」个「頂郊」，包括晉江(tsìn-kang)、南安(lâm-uann)、惠安(huī-uann)；「下(ē)」是指「同安(tang-uann)人」个「下郊（廈郊）」。斯當時，三邑人參同安人為著地頭相爭(sann-tsinn)，相拍līn-lōng叫是庶常事(sìr-siông-tāi)，三邑人路尾借安溪(an-khere)人个祖師廟做路草，共廟寺放火燒出一條火路，拍入去同安人徛起个「八甲庄(pueh-kah-tsng)」，致使人額佔少數个同安人共怹个城隍爺𢯾--咧！走徙去北頂个大稻埕(tāu-tiânn)。

「郊(kau)」若用現代華語來解說(kué-serh)，就是「同業工會」个意思，日本時代叫做「同業組合(どうぎょうくみあい)」；「郊」是閩臺地區特有个風格詞，在來个歷史學家一直無法度究勘出伊个語源，最近看著有人認為「郊」是借自英語个「guild」，聽落到塊閣嶄然有理氣！

「咸豐三，講到今。」意思是咧排斥(pâi-thik)人見講攏講過去許「古老so̍k古」个事志(tāi-tsì)，共迄件事志比並(pí-phīng)做若咸豐三年迄陣發生个「頂下郊拼」，遐爾古早个事志到今猶閣咧講！

ps.教育部《臺灣閩南語我嘛會》〈鹿港八郊〉一文，共「guild」誤植做「gould」，「八郊」注文讀音「pat-kau」，嘛參阮鹿港人講个「pueh-kau」相出入。