Tâi-gír

現代華語講--个『春捲』、『潤餅捲』，在來个閩臺語愛叫做「潤餅」、「潤餅𩛩(jūn/lūn-piánn-kauh)」，根據教育部「臺灣閩南語常用詞辭典」个方言差詞彙比較表，宜蘭有講「春捲(tshun-kuínn)」，金門有講「拭餅(tshit-piánn)」、「拭餅𩛩」，馬公（媽宮）有講「薄餅」，新竹有講「春餅」、「雞捲(kue-kńg)」。

只字「𩛩」--字是「食」--字--爿，正手爿閣一字「夾」--字，有个電腦無法度顯示。「𩛩」--字毋干焦是做名詞，嘛會用得當做「動詞」、「量詞」，可比講「頭家--啊！潤餅𩛩，𩛩--五-𩛩。」第一字「𩛩」是名詞、佇tserâ讀本調，第二字「𩛩」是動詞、佇tserâ嘛讀本調，第三字「𩛩」是量詞，佇tserâ是讀做輕聲。「𩛩(kauh)」--字佇咱个生活中論真也真捷出現，親像「𩛩檳榔」、「一𩛩檳榔」、「尿苴仔𩛩」、「𩛩肥」。

「潤餅」个皮號做「潤餅皮」，做潤餅皮个迄个動作是「拭(tshit)」，講做「拭潤餅皮」，所致金門人會共「潤餅」號做「拭餅」、「拭餅𩛩」；潤餅皮个量詞用「領(niá)」，一𩛩潤餅步頻(pōo-pîn)著用兩領落去𩛩，則𣍐去予破--去！