Tâi-gír

臺灣戰後 ê 建築當中，上早夆列做古蹟 ê「臺北市清真寺」。

鹿港普度歌：「十七郭厝」

今仔日是舊曆七月十七，鹿港普度歌是輪到「東北四省」ê「郭厝」，「東北四省」是指鹿港街仔東北爿 ê 四个角頭－「東石」、「郭厝」、「後寮仔」、「宮後」，其中 ê「東石」、「郭厝」、「後寮仔」合稱「北頭」。

鹿港人共「郭厝」讀做「kerh--tshù」，「郭」--字讀泉腔陰入 ê 高促本調，「厝」--字讀輕聲，符合咱 ê 話「姓」+「厝」構詞 ê 呼音習慣。

鹿港姓郭--ê 分做「拜豬肉--ê」參「無拜豬肉--ê」，「拜豬肉--ê」是「日湖派」，大部份徛佇漁寮、新厝；「無拜豬肉--ê」是「白奇派」，主要徛佇郭厝、洋仔厝、溝墘。(1)「日湖派」是八世孫郭頌佇宋朝 ê 時做晉邑令，徙去徛佇晉江，囝孫仔佇元朝 ê 時，tsiah閣徙來徛佇石湖（日湖）。(2)「白奇派」嘛是來自晉江，路尾tsiah閣東遷惠安白奇，人--所--說：「白崎郭，晉江祖。」因為徛起 ê 地頭地勢較低，到隔壁鄉里愛peh一百坎(gám)石級仔(tsio̍h-khiat-á) ê「崎(kiā)」，所致號做「百崎」，漢字寫做「白奇」、「惠奇」、「白崎」，往過我捌聽泉州人說做「pe̍h-kiâ」，毋拄惠安人孫--先(DP)說亻因俺公在地人是讀做「pe̍h-iâ」，遐攏總有九个鄉里姓郭，是回族，孫--先主張寫做「白奇」是雅化。阮鹿港北頭是說【白鵝 pe̍h-giâ】，閣傳說講是因為往過走船个時，船頂个旗有一隻「白鵝」所致，「kiâ」變「giâ」嘛有可能是清音濁化。

鹿港「白奇郭」是回族後代，祖先做忌 ê 時，禁用豬肉，居喪時也禁食豬肉（原鄉五日、鹿港七旬），出山無忌沖煞，毋免看日，棺材頭向西方，無孝幡、無引魂，毋免道士而是由阿洪主持唸可蘭經。姓郭 ê 人講：「因為祖先細漢逃難 ê 時，有食豬母奶（馬齒莧）tsiah 無死。」所致居喪 ê 時若食豬肉會破喙，因此計無咧食豬肉。鹿港另外有一 ê 回族 ê 後代－「陳埭(tân-tèr)丁--家」，毋拄丁--家來臺灣了後，老早就已經無「回族」ê 生活風俗--矣！

北頭郭厝 ê 角頭廟是【郭聖王 Kerh-siòng-ông】（泉廈說「Kerh/Keh-sìng-ông」）保安宮（在地人說【聖王宮 Siòng-ông-king】），分六祧每六年輪值一遍頭家爐主，順序是

a.鼠年、馬年－白奇二房長支，

b.牛年、羊年－白奇二房五支，

c.虎年、猴年－白奇二房四支，

d.兔年、雞年－白奇二房三支，

e.龍年、狗年－日湖（東街、前街、前坑、蓬島……等），

f.蛇年、豬年－白奇五房。

臺北市白奇郭氏宗祠