初七七娘媽生－Tâi-gír

本文刊載於2015年《臺江臺語文學季刊》15，臺南市政府文化局。

七娘媽生

許嘉勇

　　舊曆 ê 七月初七號做【七夕 tshit-si̍k/sia̍h】，講是【牛郎 gû-nn̂g】kap【織女 tsik/tsit-lír/lú/lí】[1]」一年內唯一會用得相會 ê 日子。若照咱民間 ê 例，七月初七是「七娘媽生」，「七娘媽」就是天公伯--仔 ê 第七个查某囝－織女，阮鹿港在來流傳 ê〈普度歌〉也有唱著：「……初七七娘媽生……」。

　　佇「七娘媽生」只一日，逐口灶計愛來拜「七娘媽」，照阮塊(tèr/tè) ê 例，佇八仙桌中央(tshāi)一座「七娘媽亭(tân)[2]」，正爿花矸內底插一束圓仔花，倒爿囥一个圓盤仔，盤仔內底有圓仔花、芙蓉、鏡、紅紗、胭脂膨粉、床母襖(ó)，床母襖內底有閣包胭脂膨粉，桌頂有一副牲醴（三牲）掛五果、雞酒、油飯、糖粿參五碗飯菜，一千金 kap 四只四方金，若是照街頂 ê 例，油飯 kap 糖粿計是愛攢(tshuân)七碗，阮阿母(a̋u)已經簡省誠濟--囉！

　　「糖粿」嘛號做「毋情願圓」，因端(in-tuann)是牛郎 kap 織女一年干焦有一過會用得來【面會 biān-huē】，挲(so)圓仔 ê 時，愛用箸揬(tu̍h)予伊 naih--落，或--者是用「大捗母(tuā-pōo-bú)」佇圓仔中央揤(li̍h)--一下，聽說就是欲貯織女 ê 目屎；咱誠濟年節、婚喪喜慶、熱鬧時攏會拜圓仔抑是攢圓仔予親情朋友來啖糝(tām-sám)，可比講上元圓、半年圓、冬節圓、神明生、嫁娶、喪事接板(tsih-pán)轉--來……，干焦七娘媽生 ê 時愛創只 naih--落 ê「糖粿」，有影真正是「毋情願圓」。

　　一般認為「七娘媽」嘛是囝仔(kán-á) ê 守護神，所致只一日嘛愛拜「床母」，有囝仔咧睏 ê 房間計有「床母」，所致每一間有囝仔 ê 房間攏愛拜床母，一間房愛有一碗糖粿 kap 一只四方金，插三欉香，另外閣愛共床母呼請出來廳桌頂參七娘媽做陣拜，拜煞才閣請--轉去。有「請七娘（媽）絭」ê 人，只一日愛「換絭」，若是十六歲足，著愛「褪絭(thǹg-kǹg)」[3]。

　　拆(thiah)金紙落去燒了後，才來燒「七娘媽亭」，用紙#糊 ê「七娘媽亭」燒甲賰竹篾仔 ê 枝骨(ki-kut)，路尾參床母襖包 ê 膨粉做陣擲(tàn)起去厝頂，予喜鵲叨(lo)去起造鵲橋。

[1] 老泉腔共「織女」讀做「tsik-lír」。

[2] 「七娘媽亭」ê「亭」，鹿港話讀做白讀 ê「tân」，1932 年 ê《臺日大辭典》就有收錄【七娘媽亭 tshit-niû-má-tân】，「亭(tân)」--字並且加註泉腔，福建 ê 地號名有寡遺留，ex. 仙游楓亭、杏林西亭、漳浦前亭、永春呈祥亭上(tân-tsiǔnn)；阮阿祖號做「許池亭」，老勻 ê 鹿港人攏叫他「Khóo Tî-tân」，顛倒是伊 ê 一个孫（我 ê 叔伯阿叔）煞干焦會曉叫他「Khóo Tî-tîng」，孤知影「亭」--字 ê 文讀音「tîng」，毋知影「亭」--字有「tân」白讀 ê 音讀。

[3] 若照阮塊 ê 例，「拜床母」ê 期日有分做兩款：(a)「七娘媽生」參「冬節」是一直攏有咧拜床母，kàu 到我做老爸進前，阮母--仔嘛攏有咧拜，當然阮囝出世了後，定著是又閣愛攢落去拜。(b)另外一款是逐月日厝--nńg 若有鹹，雞腿共伊佮--一支，凊彩揀--一日落去拜，一直拜到囝仔十六歲【褪絭 thǹg-kǹg】，阮母--仔講按呢囝仔較好育飼。