Tâi-gír

　　下昏暗過十一點就是「子時」，「子時」過了就算是正月初九--囉！只一日是「天公生」，古早人講玉皇上帝是至高無上，所致伊的生日取新正年頭的極大之數－「初九」。

　　鹿港地區佇只一日，逐口灶的人家計是誠誠心用【頂桌 tíng-toh】、【下桌 ě-toh】豐沛的祭品來「拜天公」。頂桌是菜桌，予玉皇上帝享用，有【貼案 thiap-àn】--的用貼案，無貼案--的用八仙桌；下桌是臭臊桌，予侍從用，用八仙桌。規暝的炮仔聲往往是毋pat停--過，鬧熱的程度buě輸是閣過一遍新年的款，所致人講初九天公生號做「小過年」。若是khah厚禮數的人家，拜天公只一日著閣「食菜（茹素）」，只一日buě用得曝內衫褲、說粗喙話、冤家、殺生、動利器，祭拜進前愛先沐浴，用喜樂【鬧廳 nāu-thiann】，拜煞愛閣去街頂每一間【閤港 khap-káng】的廟寺去【行香 hîng-hiunn】。

　　頂懸是阮塊拜天公的相片（2011年），八仙桌的坐向愛先掠對吊越向厝--裡，因為拜天公著向外口拜，桌跤著愛【跂金 kér-kim】，頂桌中央(tshāi)天公【燈座 ting-tsǒ】，邊--頭一對花矸插「木本」的【生花 tshinn-hue】（下桌的花矸tsiah插「草本」--的），閣來一爿是三碗甜料（甜碗）貯糖仔，另外一爿是三碗素菜（菜碗）貯金針、木耳、香菇，無限倒爿、正爿。燈座頭前是香爐，香爐內底貯米來插香，邊--頭一對燭台，香爐頭前是【薦盒 tsiàn-a̍p】，紲--落去排「五果、三牲」，一盒【牽仔條 khan/khian-á-tiâu】（在來是用12條，閏月用13條），一模(bôo)甜粿（照講愛攢「龜、粿、粽」），頂頭愛插「飯春」（阮a̋u buě記--得），三甌茶米茶（以茶代酒），三ut麵線用甌仔貯（阮母--仔khah簡省，直透攢歸包--个），賰--的是豆皮、果盒kap一罐紹興--的，椅頭囥尺金、壽金、天公金、排炮。

　　鹿港街仔頂除了家家戶戶kāi-kī佇厝--裡拜天公以外，一寡「角頭」嘛以角頭爐个方式，組織幾lō个「天公會」的神明會，每一年跋「頭家爐主」來輪值，根據日本時代的《鹿港神明會調》kap田調資料，鹿港計共有「金長興街」、「金泰興街」、「金和興街」、「金福興街」、「金順興街」、「金德興街」、「金永興街」、「崎仔腳」、「菜園」、「橫街仔」、「崙仔頂」、「街尾」、「竹圍仔」只十三个天公爐，頭前許五个角頭（長興街、泰興街、和興街、福興街、順興街）所形成的街市，就是嶄然出名的「五福街」；現tsú時的天公爐有四个已經散--去--矣！分別是金泰興街、金福興街、橫街仔、崎仔腳，猶賰九个有咧當(tng)頭家爐主。

　　下底倒手爿只張相片是歲次壬辰年（2012）跋著「金和興街」天公爐爐主的【報條 pòo/pò-tiâu】、天公爐kap爐主燈，爐主是佇中山路誠有名聲的龜粿店「鄭興珍」。正手爿是金和興街天公爐拜天公的款式（2001年）。