人--所--說：「初五【假開 kè-khui】，初六【舀肥 ió/iúnn-puî】」，徛算講【新正年頭 sin-tsiann nî-thâu】kàu 一个坎站--囉！kóo 人著愛開始發落 kāi-kī ê 穡頭，所致真濟人計是佇初五只一日來【開工 khai-kang】、【開市 khuī-tshǐ/tshī】，讀書人嘛愛「開筆」，有開工場、公司 ê 頭家人，會佇初五燒金拜拜，而且予有去工場、公司開工 ê 辛勞一个紅包。
現代人一般寫做「隔開」，毋拄銅山何煒稽考閩南主流 ê【隔開 keh-khui】本為【假開 ke3/kee3/kae3-khui】，「keh」、「kè」絕大多數 ê 腔口變調了後 sâng 音、無分，所致路尾誤做「隔開」。1712 年周元文《重修臺灣府志》就是寫【假開】：「元日蚤起，少長咸集，禮神、祭先、羹飯後，詣所親及朋友故舊賀歲；主人出辛盤相款洽，俗謂之「賀正」。過此日為常。是時屠蘇為政，醉人酣劇，相望於道，至五日乃止；謂之「假開」。」1873 年《廈英大辭典》也是記：「chhoe-gō͘ kè-khui, after the 5th of the month is past.」【假】--字在來勾破(khau/kau-phuà)，形容詞、動詞讀陰上，名詞讀陰去，【假開】ê 頭字讀做白讀 ê「kè」就是指【假日】，【假開】就構詞來講是「主謂結構」。另外，集美有 ê 講做「kìr-khui」，漳州話有 ê 頭字鼻化說做「kènn-khui」，有 ê 漳州人次字有「無送氣+鼻化」的音變→「kè-kuinn」（中央應該有一个「kènn-kuinn」ê 過渡型式），廈門、海滄次字閣進一步產生過度類推 ê「kè-kng」。
總--是，正經開始作穡 ê 日子是佇初六，所致古早人講「初六舀肥」，只句話佇漳北說做「初六【壅肥 ìng-puî】」。在來咱 ê 話共 "toilet" 號做【屎礐 sái-ha̍k】、【屎礐仔 sái-ha̍k-á】、【礐仔 ha̍k-á】，「礐」是《教典》个用字，有註明是替代字，本字應當是「㙏」或--者是「𥨍(上穴下復)」。倒手爿 ê 相片是阮外媽目今猶咧用 ê「屎礐」（佇寶斗廍後仔），正手爿許(hí)張是金門小西門 ê 縣定古蹟『模範廁』。阮塊 ê 屎礐，kàu 我做兵 ê 時 tsiah 坉--起來，我也是從細漢跍屎礐大漢--ê，往時定定計嘛看見阮俺公咧舀肥。「舀肥」就是共「大肥（粗肥）」對(uì)屎礐舀--起來，會用得沃踮 kāi-kī ê 田--裡、宅仔（菜宅），嘛會用得賣--人，所致往過ê鹿港時行一句話：「街仔人（鹿港人）上敢死，放屎換秫米；庄跤人上槌(thuî)，提(thue̍h/the̍h)米換大肥。」
臺灣人因為受著日本政府 ê 統治，所致佇日本時代開始借用日本話 ê「便所(べんじょ)」來做咱臺語 ê 外來詞，顛倒現代 ê 日本話已經無咧講「便所(べんじょ)」--囉！現代 ê 日本話是講做「トイレ」，是借自法語 "toilette" ê 外來語；毋拄臺語 ê「便所」並毋是音譯日語漢字詞（可比講林檎、箪笥(thàng-sìr/sù)），而是以臺語音來讀日語漢字，所致愛讀做「piān-sóo」。金門因為受日本政府 ê 統治無 huàn 久長，所致現主時 ê 金門人 kap 廈門 sâng 款是講【廁所 tshè-sóo】，並無講臺灣人講 ê「便所(piān-sóo)」，早期 ê 白話字文獻也有記做「tshik-sóo」（ex.《可愛的仇人》）。
雖然古早 ê 屎礐已經無 siánn 人咧用--囉！毋拄 kap「屎礐」有關係 ê 俗語猶是有--寡：
屎礐無三日新。
屎礐也有三日新。
袂輸屎礐仔蟲。
屎礐仔蟲假清。
屎礐仔點電火。
新屎礐，好放屎。
一礐屎，看三擔。
鳥鼠跋落屎礐。
屎緊，tsiah 欲開(khui)礐；上轎，則卜放尿。
屎緊，褲帶拍死結。
看斑鴿，無看屎礐。
屎礐仔愈撓愈臭。
屎礐仔蟲閣泅清水。
六月六，風颱掀屎礐。
十月十，風吹落屎礐。
屎礐仔枋袂做得神主牌。
屎礐仔枋毋通做中脊楹。
屎礐蠓蟲，無嫌好歹尻川。
驚跋落屎礐，毋驚火燒厝。
讀冊讀六冬，煞捌無一塊屎礐枋。
豆仔看做羊仔屎，屎礐蟲看做肉筍。
歹子生多討歹命，放落屎礐
屎礐仔肥舀挕拺，抾鳥仔屎來做肥。
愛睏，去做死人；愛食，去做屎礐仔蟲。
新娘媠噹噹，褲底破一空，頭前開店窗，後壁賣米芳，米芳無人買，跋落屎礐仔底。
人插花，伊插草；人抱嬰，伊抱狗；人未嫁，伊先走；人坐轎，伊坐畚斗；人睏紅眠床，伊睏屎礐仔口。
留言列表
