close
下晡載阮牽--个轉去怹外媽怹塊（麥寮鄉橋頭村施厝寮），踮門跤口看厝邊兜个門聯，五副有三副个頂下聯計貼毋著爿--去。
現代賣門聯个生理人，會佇頂下聯後壁頓一字「大」--字抑是「小」--字，只字「大」參「小」是指「倒爿」參「正爿」，tserâ所講个正爿、倒爿愛徛佇建築本身來看，也就是對(uì)厝內看倒出--去，即有符合傳統「左尊右卑」个空間觀念，親像大廳就是以神明、公媽个正爿做正爿。
在來有咧做對仔个讀書人計知影分別頂下聯个理氣是「平仄(piânn-tseh)」，尾字若是「仄聲」做頂聯，尾字若是「平聲」做下聯，頂聯貼踮倒爿（大爿），下聯貼踮正爿（小爿）；「平仄」若用中文系北京官話來呼音，常常是袂對同(tuì-tâng)，佇臺灣上適合來分別平仄个話語就是臺語、客話，以第1聲（陰平）、第2聲（陰上）、第3聲（陰去）、第4聲（陰入）、第5聲（陽平）、第6聲（陽上）、第7聲（陽去）、第8聲（陽入）只八个聲調為基準，第1聲參第5聲是平聲，賰--个就是仄聲。
只兩副門聯正確个貼法應當是，上聯：「福祿壽三星拱照」，下聯：「天地人一氣同春」；上聯：「五福臨門春滿院」，「八方進寶富連城」。
全站熱搜
留言列表
