close
論真，【大厝 tuā-tshù】ê 本義會用得講就是現代人時行咧講 ê『豪宅』，咱 ê 話啟蒙童書《千金譜》就有寫著一句：「大厝九包五，三落百二門」，【落 lo̍h】是厝宅主建築縱深方向 ê 單位，也號做【進 tsìn】，所致往過有袂少厝是【三落大厝】，佳冬蕭--厝猶保留誠完整 ê【五落大厝】；陳雷 ê 臺語歌〈歡喜就好〉嘛有唱著【大厝歹摒掃】。有關【大厝】ê 俗語窮實野濟，可比講：
1.大厝大奒奒，餓--死無人知。Tuā-tshù tuā hai-hai, gō--sí bô lâng tsai.2.年年賰，年年富，年年起大厝。Nî-nî tshun, nî-nî pù, nî-nî khí tuā-tshù.3.豬來窮，狗來富，貓來起大厝。Ti/Tu/tir lâi kîng, káu lâi pù, niau lâi khí tuā-tshù.4.未富，毋通（想欲）起大厝；未有，毋通（想欲）娶新婦。Buē/Bē/Bēr pù, m̄-thang（siūnn/siōnn-beh/bueh/berh/boh）khí-tuā-tshù, buē/bē/bēr ū, m̄-thang（siūnn/siōnn-beh/bueh/berh/boh）tshuā sin-pū.5.一更窮，二更富，三更起大厝，四更拆/走袂赴。Tsi̍t/Tsi̍k-kenn/kinn kîng, jī-kenn/kinn pù, sann-kenn/kinn khí tuā-tshù, sì-kenn/kinn thiah/tsáubē/buē hù.6.跋筊人(pua̍h-kiáu-lâng)三更窮、四更富，五更起大厝，天光叫噓虖(hi/hu/hir-hu)。7.欲起就起大厝，欲跋就跋大注。Beh/Bueh/Berh/Boh khí tio̍h/to̍h/tiō/tō/tsiū khí tuā-tshù, beh/bueh/berh/boh pua̍h tio̍h/to̍h/tiō/tō/tsiū pua̍h tuā-tù.8.大厝起雙排，錢銀捷捷來。Tuā-tshù khí siang/sang pâi, tsînn-gîn/gûn/gîrn tsia̍p-tsia̍p lâi.
另外，彰化秀水有一間國定古蹟「益源大厝」，2010年彰化縣文化局出版《彰化縣古蹟導覽叢書—益源古厝》，只卷導覽手冊是我負責撰寫--ê。只間古蹟本底計是號做「益源大厝」，有一遍我閣去現場補相片 ê 時，搪著一位志工叔--仔，伊建議我共書名改做「古厝」，伊講因為臺語 ê【大厝】是「棺材」ê 意思，斯當時我對臺語無 siánn-mih 研究，聽伊按呢講嘛感覺誠有理氣，所致我就共書名改做「益源古厝」；lōo尾我開始斟酌臺語，煞發覺我共「益源大厝」改做「益源古厝」是毋著--ê，誠後悔！
以上所講--ê 是【大厝】ê 本義，現代人多數已經毋知影只个本義，掠準【大厝】干焦「棺材」ê 意思，其實「棺材」是【大厝】ê 引申義，意思是亡者過身了後，伊所蹛 ê hit 副棺材（hit 塊板、hit 支壽）就是伊以後 ê『豪宅』，權算是一種「euphemism(委婉語)」，並毋是”專指”老大人【年老 nî-lāu】 ê 時所【張老 tiunn-lāu】ê「棺材」，1932年《臺日大辭典‧下冊》（如下圖）就共本義 kap 引申義分列做兩个義項，翻譯做中文就是下底《教典》ê 釋義，毋拄第二个釋義 ê 例句寫了無好。
1.[名]大房子、廣廈。例：聽講亻因兜彼間大厝這馬是古蹟。Thiann-kóng in tau hit king tuā-tshù tsit-má sī kóo-tsik. (聽說他家的那間大房子現在是古蹟。) 2.[名]棺材。例：古早的老大人大部份攏會家己買大厝。Kóo-tsá ê lāu-tuā-lâng tuā-pōo-hūn lóng ē ka-kī bé tuā-tshù. (古時候的老人家大部分都會自己買棺材。)
啊若咱人猶在生 ê 時就先蓄(hak) ê「棺材」，咱 ê 話號做【徛壽 khiā-siū】，蓄了會先徛佇廳--裡，阮老爸講伊細漢 ê 時，佇阮庄--裡（鹿港埤脚）嘛猶看會著，我幼稚園 ê 時綴阮俺公去澎湖望安遊覽也有看--過，十年前我去泉州蚶江嘛猶有人 tshāi 佇廳--裡，【徛壽 khiā-siū】就是下底只兩張相片按呢。
全站熱搜
留言列表
