Tâi-gír

　　阮學校就佇【木柵  ba̍k-sa】參「景美」ê 中間，較倚景美，毋拄在地人若是拄搪神明生抑是鬧熱 ê 時，計是算佇「木柵」，這就是學術上「聚落研究」ê 分類法。

　　「景美」兩字，正梘尾人、木柵人、新店人......攏是讀「kíng-bér」，臺語有一句謎猜講「賣魚免攑秤」，臆一个地號名，就是【揀尾 kíng-bér/bé/bué】。我 pat 記錄阮學校一个欲臨(berh-lím)七十歲 ê 工友高美雲女士 ê 實際音值，若是用五度制 ê 標音法來記音，伊就是讀「kiŋ-44 bə53」。究勘「景」--字 ê 語源，當然是源自【梘 kíng】，「梘」就是「筧」，意思是「引水个竹管」，設佇頭到--ê 就號做「梘頭」，設在出尾--ê 就號做「梘尾」，有只一字「梘」ê 地號名，佇臺灣窮實是袂少，干焦鹿港郊外就有兩个「浮梘」，後--來嘛攏改寫做「浮景」，臺中北屯 ê 水景（舊名水梘頭）嘛是一个例。

 　　「景美」舊名「梘尾」，「尾」--字依漳泉差來分，有三个白讀音「bué（漳）」、「bé（新泉）」、「bér（老泉）」，對(uì)一部份 ê 鶯歌、三峽、新店、一部份 ê 艋舺、大安區、文山區（景美、木柵）、深坑仔、石碇仔、坪林、平溪、一部份 ê 瑞芳、暖暖、七堵、汐止、南港區、信義區、松山區，只一大片地頭計是安溪人分佈 ê 所在，所致老輩--ê 是讀做「bér」，現 tsú 時較少年氣--ê 當然是已經行向普通腔 ê「bué」。

　　因為「尾」--字 ê 文讀音無分漳泉差計讀做「bí」，白讀有頂頭「bér/bé/bué」三音，只字「美」--字 kap「尾」--字 sâng 音，有文讀「bí」、白讀「bér/bé/bué」三音，所致通臺灣、閩南地區共舊地號名 ê「尾」--字改做「美」--字 ê 例 uan-ná 誠濟，徛算講是「同音雅化」，可比講北投 ê 洲美（洲仔尾）、楊梅 ê 水美（水尾）、外埔 ê 水美（內水尾）、莿桐 ê 大美（大埔尾）、溪口 ê 美南/美北（崙尾）、六腳 ê 港美（港尾）、屏東 ê 溝美（溝仔尾）、礁溪 ê 林美（林尾）、瑞穗 ê 瑞美（水尾埔）、澎湖 ê 講美（港尾）、金門 ê 沙美（沙尾）、廈門 ê 集美（潯尾）、同安 ê 褒美（埔尾）、同安蓮花 ê 美埔（尾埔）、海滄 ê 漸美（斬尾 tsām-bué）、海滄 ê 鼎美（鼎尾）、龍海 ê 角美（角尾）、龍海 ê 東美（東尾）、龍海東園 ê 埭美（埭尾）、南安以及五都 ê 康美（坑尾）、南安以及漳浦 ê 霞美（下尾）、雲霄 ê 莆美（埔尾）、平和 ê 雲美店（洋尾店）......，族繁不及備載。