初九興化媽祖宮口－Tâi-gír

〈鹿港普度歌〉下今仔是「初九興化媽祖宮口(tshue-káu Hing-huà má-tsóo-king-kháu)」。

「興化媽祖宮」正式个名稱是「興安宮」，目今是彰化縣个縣定古蹟，相傳佇康熙23年(1684)由興化人造作(tsō-tsok)而成，是鹿港上早个媽祖宮。興化是清朝時福建省个一个府，號做「興化府」，佇「福州府」个南爿、「泉州府」个北爿，媽祖婆林默娘个故鄉佇湄州嶼，清朝時就是屬佇興化府莆田縣。道光年間个《彰化縣志》有記載興安宮是「閩安弁兵公建」，若根據阮先生林會承教授个稽考，興安宮是「閩安營」个會館，也就是上早來鹿港个阿兵哥所起--个。

相片是2001年翕--个，收錄佇遠流出版社《鹿港深度旅遊》p.62。